மத்திய பட்ஜெட் 2016-17 விலை உயரும் பொருட்களும், விலை குறையும் பொருட்களும்

மத்திய பட்ஜெட்டில், வரி உயர்வு காரணமாக விலை உயரும் பொருட்களின் விவரமும், சலுகை காரணமாக விலை குறையும் பொருட்களின் விவரமும் வருமாறு:-

விலை உயரும் பொருட்கள்

* கார்கள் மீது உள்கட்டமைப்பு கூடுதல் வரி 4 சதவீதம்வரை விதிக்கப்படுவதால், கார்களின் விலை ரூ.3 ஆயிரம் முதல் ரூ.1 லட்சத்துக்கு மேல் உயரும். ரூ.10 லட்சத்துக்கு மேல் விலை கொண்ட சொகுசு கார்கள் மீது தனியாக 1 சதவீத வரி விதிக்கப்படுவதால், அத்தகைய சொகுசு கார்களின் விலை மேலும் கூடும்.

* அனைத்து சேவைகள் மீதும், உணவகத்தில் சாப்பிடுதல், தியேட்டரில் சினிமா பார்த்தல், கட்டணம் செலுத்துதல் போன்றவை உள்ளிட்ட செயல்பாடுகள் மீதும் ‘கிரிஷி கல்யாண் செஸ்’ என்ற புதிய கூடுதல் வரி (0.5 சதவீதம்) விதிக்கப்படுவதால், மேற்கண்ட சேவைகள் மற்றும் செயல்பாடுகளுக்கான கட்டணம் உயரும்.

* ரூ.2 லட்சத்துக்கு மேற்பட்ட ரொக்க பரிவர்த்தனைக்கு மூலத்தில் 1 சதவீத வரி விதிக்கப்படுவதால், ரூ.2 லட்சத்துக்கு மேற்பட்ட ரொக்க பரிவர்த்தனைக்கு கூடுதல் செலவாகும்.

* பீடியைத் தவிர, இதர புகையிலை பொருட்கள் மீதான உற்பத்தி வரி, 10 சதவீதம் முதல் 15 சதவீதம்வரை உயர்த்தப்படுவதால், சிகரெட் உள்ளிட்ட புகையிலை பொருட்களின் விலை உயரும்.

* விமான எரிபொருள் மீதான உற்பத்தி வரி 8 சதவீதத்தில் இருந்து 14 சதவீதமாக உயர்வதாலும், கூடுதலாக ‘கிரிஷி கல்யாண் செஸ்’ கூடுதல் வரி விதிக்கப்படுவதாலும் விமான பயண கட்டணம் உயரும்.

* மினரல் வாட்டர் உள்ளிட்ட குடிநீர் மீதான உற்பத்தி வரி உயர்த்தப்படுவதால், குளிர்பானங்கள் மற்றும் மினரல் வாட்டர் விலை உயரும்.

* ஆயிரம் ரூபாய் விலைக்கு மேற்பட்ட ஆயத்த ஆடைகள் மீதான உற்பத்தி வரி 2 சதவீதமாக உயர்த்தப்படுவதால், அவற்றின் விலை அதிகரிக்கும்.

* இறக்குமதி செய்யப்பட்ட கவரிங் நகைகள் மீதான சுங்க வரி, 10 சதவீதத்தில் இருந்து 15 சதவீதமாக உயர்த்தப்படுவதால், அவற்றின் விலை உயரும்.

* தொழிற்சாலைகளில் பயன்படுத்தப்படும் சூரியசக்தி வாட்டர் ஹீட்டர் மீதான சுங்க வரி, 10 சதவீதமாக உயர்த்தப்படுவதால், அதன் விலை உயரும்.

* உள்நாட்டில் தயாரிக்கப்படும் செல்போன்களில் பயன்படுத்தப்படும் சர்க்யூட் போர்டுகள் மீது வரி விதிக்கப்படுவதால், அவற்றின் விலை 1 சதவீதம் அதிகரிக்கும்.

* மூத்த வக்கீல்கள் மற்றும் சட்ட ஆலோசனை நிறுவனங்களின் சட்ட உதவியை பெறுவதற்கு அளிக்கப்பட்டிருந்த சேவை வரி விலக்கு ரத்து செய்யப்படுகிறது. எனவே, அவர்களின் சேவையைப் பெறுவதற்கு சேவை கட்டணம் செலுத்த வேண்டும்.

* ஸ்மார்ட் கெடிகாரங்களின் விலை அதிகரிக்கும்.

* வீடு காலி செய்யும்போது, வீட்டில் உள்ள பொருட்களை வாகனத்தில் கொண்டு செல்ல வாடகைக்கு அமர்த்தப்படும் நிறுவனங்களுக்கான சேவை வரி 4.2 சதவீதத்தில் இருந்து 5.6 சதவீதமாக உயர்த்தப்படுகிறது. இதனால், அதற்கான கட்டணம் அதிகரிக்கும்.

* இறக்குமதி செய்யப்படும் பந்தய கார்கள் மீதான சுங்க வரி, 10 சதவீதத்தில் இருந்து 60 சதவீதமாக உயர்த்தப்படுவதால், அக்கார்களின் விலை உயரும்.

* லாட்டரி டிக்கெட்டுகளுக்கு சேவை வரி விதிக்கப்படுவதால், அவற்றின் விலை உயரும்.

* இணையதள வாசிப்புக்கு பயன்படும் இ-ரீடிங் சாதனங்கள் மீதான சுங்க வரி உயர்த்தப்படுவதால், அவற்றின் விலை உயரும்.

* சுத்திகரிக்கப்பட்ட தங்க கட்டிகள் விலை உயரும்.

விலை குறையும் பொருட்கள்

* காலணி தயாரிப்பு மூலப்பொருட்கள் மீதான உற்பத்தி வரி குறைக்கப்படுவதால், காலணிகள் விலை குறையும்.

* உற்பத்தி வரியில் இருந்து விலக்கு அளிக்கப்படுவதால், சூரிய சக்தி விளக்குகளின் விலை குறையும்.

* பிராட்பேண்ட் மோடம், செட் டாப் பாக்ஸ் ஆகியவற்றின் மீதான உற்பத்தி வரி 12.5 சதவீதத்தில் இருந்து 4 சதவீதமாக குறைக்கப்படுவதால், அவற்றின் விலை குறையும்.

* டிஜிட்டல் வீடியோ ரெக்கார்டர், கண்காணிப்பு கேமராக்கள் ஆகியவற்றுக்கு உற்பத்தி வரியில் இருந்து விலக்கு அளிக்கப்படுவதால், அவற்றின் விலை குறையும்.

* ஹைபிரிட் மின்சார வாகனங்களின் என்ஜினுக்கான உற்பத்தி வரி, 12.5 சதவீதத்தில் இருந்து 6 சதவீதமாக குறைக்கப்படுவதால், அந்த வாகனங்களின் விலை குறையும்.

* ஸ்டெரிலைஸ்ட் டயாலிசர் மீதான உற்பத்தி வரி ரத்து செய்யப்படுவதால், சிறுநீரக டயாலிசிஸ் செலவு குறையும்.

* மைக்ரோவேவ் ஓவனில் பயன்படுத்தப்படும் மேக்னட்ரான் என்ற இறக்குமதி சாதனம் மீதான சுங்க வரி ரத்து செய்யப்படுவதால், மைக்ரோவேவ் ஓவன் விலை குறையும்.

* சானிட்டரி நாப்கின் தயாரிப்புக்கான மூலப்பொருள் மீதான சுங்க வரி குறைக்கப்படுவதால், நாப்கின் விலை குறையும்.

* பார்வையற்றவர்களுக்கான காகிதத்துக்கு சுங்க வரியில் இருந்து விலக்கு அளிக்கப்படுவதால், அதன் விலை குறையும்.

* பிரதமரின் வீடு கட்டும் திட்டம், மாநில அரசுகளின் வீடு கட்டும் திட்டங்கள் ஆகியவற்றின் கீழ் 60 சதுர மீட்டர் பரப்பளவுக்கு மிகாத வீடுகளுக்கு சேவை வரியில் இருந்து விலக்கு அளிக்கப்படுகிறது. இதனால், அத்தகைய குறைந்த விலை வீடுகளின் விலை மேலும் குறையும்.